Xunta Directiva

Comeza unha nova etapa

Despois de 18 anos como socio e dezaseis como directivo, os doce últimos como vicepresidente tendo como presidentes a Pedro Outón e Carlos Garrido, dou este paso adiante con ilusión e responsabilidade. Tócame encabezar unha nova Xunta Directiva coa que queremos seguir agrandando a historia do club. No mes de marzo imos cumprir 79 anos. Temos percorrido a nosa Galicia coñecendo vales, montañas, vilas, aldeas e espazos naturais das catro provincias. Temos acadado cimas nas cordilleiras montañosas máis importantes, dentro e fóra do noso país e mesmo nos adentramos nas covas galegas máis importantes coa nova Sección de Espeleoloxía.

Tamén, dende hai uns anos, temos un convenio coa Universidade de Vigo para facer cursos de iniciación e tecnificación de escalada, utilizando o rocódromo da universidade. Os socios máis pequenos teñen a oportunidade de dar os primeiros pasos, para iniciarse nesta modalidade, no búlder do local social. O boom que está tendo a escalada reflíctese nos resultados dos nosos socios, entre os que contamos con campións a nivel galego, na categoría absoluta e categorías inferiores, e postos de relevancia na competición a nivel nacional.

A nosa Sección de Medio Ambiente, recentemente creada, desenvolve unha gran actividade: divulga publicacións científicas nas nosas redes sociais, organiza actividades de mergullo para coñecer a nosa ría, con ela facemos limpezas de praias e ríos, traballamos na erradicación de plantas invasoras e mais na deseucaliptización nos montes cercanos a Vigo ou visitamos as nosas illas para saber máis dos seus ecosistemas terrestres e mariños. No 2022 celebrouse a primeira edición, nun ciclo de tres días, sobre deporte, medio ambiente e cambio climático, con conferenciantes de primeiro nivel nestes temas.
Agora temos tamén un pequeno grupo con saídas de BTT, socios das dúas rodas que queren crecer dentro do club.

A nosa Sección Infantil e Xuvenil non deixa de medrar con actividades todos os meses, non só de sendeirismo senón tamén didácticas. Ademais, algunha das súas saídas foi feita conxuntamente coa sección de adultos, para así gozar todos da montaña en bo ambiente.