04 Dic
Actividades dos Infantís, Actividades Montañismo e Sendeirismo, Fotos

‘RUTA DAS ALMIÑAS’ COA VOGALÍA INFANTIL. DOMINGO 3 DE DECEMBRO

O pasado domingo 3 de Decembro, fixemos parte da ruta das Almiñas (PRG-109) en substitución da que tiñamos prevista que era a da Pedra do Lobo- Alto de Fontefría, pois estaba intransitable por mor do crecemento da matogueira de xestas e toxos.

O PRG-109, situado no concello de Pontecaldelas, máis concretamente na parroquia de Caritel, é un sinxelo sendeiro circular de aproximadamente uns 11 km no que puidemos contemplar non só a arquitectura popular dos cruceiros, petos de ánimas, poldras, etc, se non tamén adentrarnos nun mundo etnográfico e natural en torno o río Verdugo.

Lamentablemente no puidemos completar a ruta por mor da enchenta do devandito río… o paso polas poldras c@s cativ@s non era segura e improvisamos cun sendeiro de pescadores que percorre parte da ribeira do Verdugo. Voltaremos noutra ocasión porque o sendeiro promete (PRG-109).

 

Para ver FOTOGALERÍA premer AQUÍ

27 Nov
Actividades Montañismo e Sendeirismo, Fotos

‘RUTA A BROA – A MERCA’. DOMINGO 26 DE NOVEMBRO

A proposta para este domingo 26 de novembro foi desprazarnos ata o concello ourensán da Merca para realizar un fermoso percorrido coñecido como ruta da Broa (denomínase A Broa ao territorio conformado polas parroquias de Corvillón, Entrambosríos, Olás e Zarracós, todas elas pertencentes ao concello da Merca e situadas na marxe esquerda do río Arnoia).

O percorrido da ruta levounos por congostras, sendas e corredoiras que se usaban antigamente para ir dunha aldea a outra. Tamén percorrimos un tramo do chamado “Camiño Real”, usado polos zapateiros de Vilanova dos Infantes para ir comprar o coiro a Allariz. Transcorre na súa maior parte por carballeiras e soutos, e que nos permitiu coñecer os fantásticos bosques autóctonos (rebolos e soutos de castiñeiros) desta comarca ourensá.

Iniciamos a marcha xunto a minicentral hidroeléctrica da Merca para dirixirnos, logo dunha pequena subida, a Entrambosríos onde tomamos o camiño que, en lixeiro ascenso, nos foi levar a Olás e Oxén. Logo, o Camiño Real conduciunos á aldea de Fontao para baixar ata a presa do Cholas, no río Arnoia, por camiños de carros recuperados que pasaban por carballeiras e soutos centenarios, bosques ben conservados e fermosas paisaxes. Xa ás beiras do Arnoia, camiñamos por antigos carreiros e sendas de pescadores pasando xunto a restos de pontellas e muíños.
Pasada a aldea abandonada da Ponte Hermida remontamos a ladeira Sur do val en dirección a Covas do Río e ao lugar coñecido como Coto das Moas. Seguindo o camiño, puidemos divisar á nosa dereita a canle do Ruca, para chegar a Entrambosríos e coller, de novo, o tramo común da ruta ata onde nos deixou o autobús.

En total desfrutamos de algo máis de dezaoito quilómetros doutro fantástico percorrido de outono.

 

 

Agradecementos:

Grazas a José Antonio, Manolo Panxón e Javier Sánchez por oganizar e conducir esta actividade.

Grazas a Lois Faro, Manolo Panxón e Santi Boado polas fotografías.

24 Nov
Actividades dos Infantís, Actividades Montañismo e Sendeirismo

PEDRA DO LOBO – FONTEFRÍA – COVELO. DOMINGO 3 DE DECEMBRO

Como montañeiras e montañeiros que somos, e presumimos diso, imos facer unha ruta circular duns 13 km que ten coma principio e fin Santiago de Covelo, e que nos levará ata o alto de Fontefría.
Este percorrido vai preto do río Portopiñeiros, polo que veremos o bosque de ribeira, as brañas, as matogueiras e un piñeiral no mencionado alto.

A volta, en continuo descenso, farémola pola man dereita do río para regresar ao lugar de Fonte dos Bidros. De alí a un pouco chegaremos ata o miradoiro da Carballeda para continuar ata o castro dende o que se contempla o val que rega o río Tea. Continuamos ata Fontán para de alí a un pouco chegar a Covelo.

A lista está aberta dende o o xoves 23 de novembro.

22 Nov
Notas Informativas

‘RUTA A BROA – A MERCA’ ESTE DOMINGO 26 DE NOVEMBRO

AVISOS: 

  • A saída será este domingo 26 de novembro ás 08:00 horas dende a Praza de España.
  • A lista abriuse o xoves 16 de novembro e se pechará este xoves 23 de novembro.

‘RUTA A BROA – A MERCA’. 26 DE NOVEMBRO ESTE DOMINGO 26 DE NOVEMBRO

A proposta para este domingo 26 de novembro é desprazarnos ao concello ourensán da Merca para realizar un fermoso percorrido coñecido como ruta da Broa (denomínase A Broa ao territorio conformado polas parroquias de Corvillón, Entrambosríos, Olás e Zarracós, todas elas pertencentes ao concello da Merca e situadas na marxe esquerda do río Arnoia).

O percorrido da ruta levaranos por sendas e corredoiras que se usaban antigamente para ir dunha aldea a outra.Tamén percorreremos un tramo do chamado “Camiño Real”, usado polos zapateiros de Vilanova dos Infantes para ir comprar o coiro a Allariz. Transcorre na súa maior parte por carballeiras e soutos e vainos permitir coñecer os fantásticos bosques autóctonos desta comarca ourensá.

Iniciaremos a marcha xunto a minicentral hidroeléctrica da Merca para dirixirnos, logo dunha pequena subida, a Entrambosríos onde tomaremos o camiño que, en lixeiro ascenso, nos vai levar a Olás e Oxén. Logo, o Camiño Real conduciranos á aldea de Fontao para baixar ata a presa do Cholas, no río Arnoia, por camiños de carros recuperados que pasan por carballeiras e soutos centenarios, bosques ben conservados e fermosas paisaxes. Xa ás beiras do Arnoia, camiñaremos por antigos camiños e sendeiros de pescadores pasando xunto a restos de pontellas e muíños.
Pasada a aldea abandonada da Ponte Hermida remontaremos as ladeira S do val en dirección a Covas do Río e ao lugar coñecido como Coto das Moas, onde nos esperan, agochados entre as árbores, curiosos penas do equilibro. Seguindo o camiño, poderemos divisar á nosa dereita a canle do Ruca, para chegar a Entrambosríos e coller, de novo, o tramo común da ruta ata onde nos deixou o autobús.

Serán sobre dezaoito quilómetros que non presentan maiores dificultades. Apta para todas as condicións físicas.

 

  • INCIDENCIAS
Chamar aos teléfonos habituais entre outros que se proporcionarán coma sempre antes da actividade
  986 420 551
  660 693 535

 

22 Nov
Actividades dos Infantís, Actividades FGM, Actividades Montañismo e Sendeirismo

LECTURA MANIFESTO 60º ANIVERSARIO FGM (1963-2023) EN VILARIÑO DE CONSO

A fin de semana do 11 e 12 de novembro, en Vilariño de Conso (Ourense), reunidas a sección infantil e mais os adultos, o noso Presidente do Club Peña Trevinca Montañeiros de Galicia, Lois Faro Fortes, co gallo do 60 º aniversario da fundación da Federación Galega de Montañismo, deu lectura a un manifesto sobre a súa orixe e a do montañismo en Galicia.

Podes ver os vídeos da lectura do manifesto e celebración en comentarios da correspondente publicación na nosa conta oficial de Facebook ou premendo AQUÍ. 

Podes ler o manifesto completo premendo sobre a imaxe a continuación: 

 

22 Nov
Actividades Escalada

NATALIA VALE E SANTIAGO FRANCO ACADAN O PRIMEIRO E SEGUNDO POSTO DO BOULDER FESTIVAL NO HANGAR4 DA CORUÑA

O pasado sábado 18 de novembro tivo lugar o Boulder Festival no Hangar4 da Coruña cunha magnífica participación de deportistas chegados de distintas partes de España e mesmo do estranxeiro. Entre @s nosos soci@s, Natalia Vale acadou o 1º posto na categoría feminina e Santiago Franco o 2º posto en categoría masculina. Moitos parabéns dende o seu Club Peña Trevinca Montañeiros de Galicia.
20 Nov
Actividades bicicleta, Fotos

‘SAÍDA DA SECCIÓN BTT POR SOUTELO DE MONTES’. SÁBADO 18 DE NOVEMBRO

Presentámosvos unha nova saída da sección BTT do Club Peña Trevinca Montañeiros de Galicia. Esta actividade tivo lugar o pasado sábado 18 deste mes pola contorna de Soutelo de Montes, en Terras de Forcarei, no interior da provincia de Pontevedra, participando sete persoas socias.

 

Aínda que por fin xa non nos choveu, os camiños estaban cheos de auga, nalgúns puntos asolagados, polo que tivemos que ir vadeando moitos tramos do noso percorrido. Mais isto non resultaría un impedimento para continuar e completar o noso camiño. Non houbo que lamentar nigún tipo de incidencias como inoportunos pinchazos a pesares da cantidade de ourizos de castiñeiro e toxos que atopamos no noso percorrido. Cómpre destacar a beleza da paisaxe de outono e tamén a cantidade de auga que levaba a fervenza da Chamosa en Forcarei, despois dun episodio de chuvias que durou máis dun mes.

Ao rematar a ruta chegou o merecido descanso, o momento de xantar e repoñer forzas nunha pizzería-vinoteca en Soutelo de Montes

*Lembra que para participar nestas actividades cómpre estar federad@ co suplemento BTT

 

Características técnicas da ruta: 
  • Lugar: Soutelo de Montes 
  • Tempo en movemento: 3 horas 29 minutos
  • Tempo total: 5 horas 36 minutos
  • Distancia: 32,38 quilómetros
  • Dificultade técnica: moderada
  • Altitude maxima: 709 m 
  • Altitude mínima: 495 m
  • Desnivel positivo: 651 m 
  • Desnivel negativo: 651 m
Ligazón ruta e percorrido por Wikiloc

 

Para ver fotogalería e vídeos premer AQUÍ

 

 986 420 551
17 Nov
Actividades Montañismo e Sendeirismo, Actividades Sociais-Culturais, Notas Informativas

‘BELÉN DE CUMES E MARCHA DO PAVO’. A FRANQUEIRA – DOMINGO 17 DE DECEMBRO

Como é costume, a estas alturas do ano, toca facer a saída do Belén de Cumes-Marcha do Pavo. Saída de domingo que é unha parte importante da tradición do noso club.
A marcha do pavo consiste nunha marcha de regularidade por parellas. A parella que realice o percorrido nun tempo máis próximo á media de todas as parellas participantes será a gañadora. O premio: un extraordinario pavo.

Este ano a marcha terá lugar por terras do concello da Cañiza. A ruta iniciarase na Franqueira. Seguiremos o camiño do viacrucis ata chegar á Cruz da Paradanta, ao Coto da Vella e á Virxe da Franqueira. Alí poremos o belén e, despois de tomar uns mazapáns e un viño doce, como xa é tradición, cantaremos unhas panxoliñas iniciándose logo a ruta sincronizada por parellas.
Todo o camiño estará marcado con cintas e contará con varios controis. De inicio dirixirémonos ao control do Curro da Paradanta para logo subir ao Chan do Rei.

Voltaremos de novo ao Curro e, a continuación, baixaremos á Franqueira, onde estará o control de chegada. Cambiados e ben acicalados colleremos o autobús que nos levará ao restaurante, onde celebraremos o xantar. Como é habitual degustaremos un suculento cocido e un bo viño do país. Despois da comida farase entrega do pavo á parella gañadora, sorteándose, a continuación, unha pavita para, desta maneira, finalizar a xornada.

IMPORTANTE: Por loxística do restaurante a lista para a marcha do Pavo e Belén de Cumes xa está aberta e se pechará o venres 8 de decembro. Dende o restaurante onde celebraremos o xantar insístennos moito en que lle debemos dar canto antes un número moi aproximado de comensais, como mínimo con dez días de antelación. É por iso que a lista está aberta dende hoxe día 16 de novembro e pecharémola antes do venres día 8 de decembro. É así que se pensades asistir insistimos en que xa vos podedes anotar. Nos vos esquezades de anotarvos antes da data límite, antes do venres 8 de decembro aínda que esteades de ponte.

*A lista está aberta dende hoxe día 16 de novembro e pecharémola antes do venres día 8 de decembro.

Anímache a participar nesta saída e celebración. Esperámosche!!

Cargar más noticias
Cargando...